Ел Елбасымен бірге

Таяуда Қазақстан Республикасының Тұңғыш президенті Н.Ә.Назарбаевтың президенттік өкілеттілігін 2020 жылға дейін ұзарту туралы жалпыхалықтық референдум өткізуді бастамашыл топ өкілдері үлкен жолға қойды.
Ел басымыздың Қазақ елі үшін жасаған ерен еңбегі ұшаң теңіз. Егеменді еліміздің тәуелсіз мемлекет болуын армандап кеткен, қазақтың нар қасқа қайраткерлерінің арманы орындалып Қазақ елі тәуелсіз мемлекетке айналды. Тәуелсіздік туын алға ұстап еліміздің басшысы болып Нұрсұлтан Әбішұлы Назарбаев сайланды. Осындай қуанышқа бөленген қазақ жұртының қуанышында шек болған жоқ. Оған бүкіл Қазақстандықтар куә.

Мұрағат қорында 1995 жылғы 29 сәуірде өткізілетін Қазақстан Республикасы президенті Н.Ә. Назарбаевтың президенттік өкілеттілігін 2000 жылдың 1-ші желтоқсанына дейін ұзарту жөнінде Республикалық референдумға байланысты Қазақстан Республикасының орталық комиссиясының жүргізген жұмыстары жазылған Қ-810, т.2, іс. 1,2,3,4,5 қордың атауы (Семей облыстық әкімшілігі) құжаттары бар. Құжаттарда Референдумге әзірлену және оны өткізу жөніндегі негізгі шаралардың күнтізбелік жоспары, Қазақстан Республикасы орталық референдум комиссиясының қаулысы, Республикалық референдум туралы анықтама жазылған. Сонымен қоса осы шараға байланысты Семей облысының әрбір мекемелері, кәсіпорындарының дайынтықтары жайлы мәліметтер тіркелген. Осы құжаттарға қарасақ сол кезде өткізілген референдумға бүкіл Семей халқы бір ауыздан қатысқанын көруге болады. Қ-810. т.2, іс.313 құжатта 1993 жылы 27-28 қыркүйекте Қазақстан Республикасының президенті Н.Әбішұлының Семейге келіп қала жұртшылығымен кездескендегі баян етіледі. Елбасымыз Семейге ат басын тіреп, көптеген мәселелерді шешкен екен. Мысалы: қазір қаламызға көрік беріп тұрған үлкен аспалы көпірдің құрылысын бастау, Шәкәрім атындағы Семей педагогикалық институтына мемлекеттік университет мәртебесін беру, Семей облысының әлеуметтік-экономикалық, қоғамдық-саяси жағдайы туралы сұрақтарды қарастырған. Елбасымыз 2007 жылы қаламыздың «Семипалатинск» атауын «Семей» деп өзгертті. Бұл өзгеріске де халық ризашылықтарын білдірді. Ал 2009 жылы Елбасымыз Семейге келіп «Өлімнен күшті » монументінде бүкіл Семей халқымен кездесіп, халықты құттықтады. Бұл туралы нақты деректер мұрағатымыздың газет қорларындағы жазылған мақалалардан көреміз.      

19 жылдық тарихы бар Егеменді елімізді дүние жүзіне паш ететін тарихи оқиғалардың барлығы Ел басымыздың бастамасымен жүзеге асты. Тұңғыш Ата заңымыз қабылданып, елтаңбамыз, әнұранымыз, туымыз көкке самғап ұшты. Ана тіліміз мемлекеттік тілге айналды. Қасиетті қарт Семейдің қасіретіне айналған ядролық сынақ жойылып, халықтың арманы орындалды.    1991 жылы тамыздың 29-ында «Семей ядролық полигонын жою туралы » президентіміз Н.Ә Назарбаев жарлыққа қол қойып, шешім шығарды.     
Семей қаласындағы Қазіргі заман тарихын құжаттандыру орталығында сақталған құнды құжаттар арасында Семей полигонын жабу туралы тарихи маңызы зор құжаттардың түп нұсқалары сақталған. Қ-103, т. 73, іс.24 қордың атауы (Семей облыстық Қазақстан коммунистік партиясы комитеті). Құжатта  Қазақстан коммунистік партия комитетінің бірінші хатшысы болған Кешірім Бозтаевтың Нұрсұлтан Әбішұлына жазған хатының түпнұсқасы сақталған.  Хаттың мазмұнында былай делінген:  «Аса қадірлі Нұрсұлтан Әбішұлы! Сіздің Қазақ елінің тұңғыш президенті болып сайлануыңыз бүкіл Семей облысының тұрғындарын серпілтіп тастады. Мен сіздің басшылығыңызбен  біздің республикамыз әлеуметтік-экономикалық және саяси жағынан алға жылжитынына кәміл сенемін. Менің бүкіл Семей халқының атынан сұрайтыным, Семей полигонын жабуға көмектессеңіз екен. Бұл ядролық жарылыс адамдардың өміріне және экологияға қауіп төндіріп тұр. 29 сәуір 1990 жыл». Осы хаттың қысқаша мазмұнына қарасақ біздің елбасына сол кезде Қазақстанның болашағының мықты аяғынан тұратынына сеніммен қарағандығын және қазір сол сенімнің ақталғанын көріп куәгер болып отырмыз.

Ия, кешегі өткен Еуропадағы қауіпсіздік және ынтымақтастық ұйымы Саммиті бүкіл қазақстандықтардың мақтанышы бола отырып, қазақ тарихына қалатын мәңгілік оқиға болса, ал ертеңгі болатын қысқы Азия ойындары бұл да Егеменді Қазақстанды бүкіл әлемге танытатын елеулі спорт жаңалығы деп білеміз. Қазіргі таңда тәуелсіз Қазақстан экономикалық, әлеуметтік және мәдени дамуды жүзеге асыратын, әлемдік қауымдастыққа өз ұстанымын бекіткен ел ретінде көрініп отыр.
Осы уақыт аралығында еліміздің жеткен жетістіктері, биік асулардан көрінгені көп ұлтты мемлекетіміздің ынтымақтастықта өмір сүріп жатқандығы Елбасымыздың атқарған ерен еңбегі деп білеміз.

Тәуелсіз Қазақстанымыздың туы биіктен көрініп, қазақ қырандары көкте самғап ұшып, жылдан-жылға, ғасырдан-ғасырға шарықтай түсетініне бәріміз сенеміз. Барлық Қазақстандықтардың мерейін үстем еткен, еліміздің тыныштығын ойлап, дамыған елдердің қатарында көрінуімізге бар күшін салған, Қазақстан Республикасының өсіп-өнуі жолында еңбек етіп келе жатқан елбасымыз Нұрсұлтан Әбішұлына мықты денсаулық тілеп, «қазақ» деген елімен бірге жасай беруін тілейміз!

Л.Қадырова
ШҚО Семей қаласы
Қазіргі заман тарихын құжаттандыру орталығының  қызметкері.